Nazirlik tərəfindən təşkil olunan brifinqdə işğal dövründə Azərbaycanın "Söyüdlü", "Vejnəli", "Dəmirli" və "Qızılbulaq" yataqlarının qanunsuz istismarı ilə məşğul olan xarici şirkətlərin adları açıqlanıb. Bu barədə jurnalistlərə Geoloji Kəşfiyyat Agentliyinin İdarə Heyətinin sədri Əli Əliyev məlumat verib. Sözügedən müəssisələr "Kanadanın "Sterlite Gold" LTD və "First Dynesty Mines"; İsveçrənin "Base Metals", "Vallex Group"; Rusiyanın "Geopro Mayninq Gold Company"; İsveç və Lixtenşteynli sahibkarların ortaq olduğu Ermənistanın "Armenian Copper Programme"; ABŞ-ın "Global Gold" və Hindistanın "Vedanta Resourcess" şirkətləridir.

Həmçinin brifinq zamanı agentliyin sədri Şərqi Zəngəzur və Qarabağda mineral xammal ehtiyatlarının qiymətləndirilməsi üzrə görülən işlər və sözügedən regionda yataqların iqtisadi dövriyyəyə cəlb edilməsi haqqında da danışıb.

Brifinqdə iştirak edən Dövlət Mineral Xammal Ehtiyatlarından İstifadə Agentliyinin İdarə Heyətinin sədr müavini Elçin Məcidov isə agentlikdə ötən il görülən işlər haqqında məlumat verib və yeni ildə "Yerin təki haqqında" qanun layihəsinə bir sıra dəyişikliklərin ediləcəyini vurğulayıb. O qeyd edib ki, hal-hazırda layihə aidiyyəti qurumlarla razılaşdırılma mərhələsindədir.