Dövlət Mineral Xammal Ehtiyatlarından İstifadə Agentliyinin sədr müavini Natiq Şirinzadənin rəhbərlik etdiyi nümayəndə heyəti iyulun 9-da Sumqayıt Kimya Sənaye Parkının (SKSP) yeni rezidenti olan “Azerbaijan Vanhong Ceramics Co.” MMC-nin Keramik plitələr müəssisəsini ziyarət etdi, istehsal prosesi ilə tanış oldu. Nümayəndə heyəti mineral xammal çıxarıldıqdan sonra onun təkrar emalı zamanı kompleks istifadənin təmin olunmasına xüsusi diqqət ayırdı. Tanışlıq çərçivəsində həmçinin istehsal zamanı istifadə olunan mineral xammal növlərinin kompleks və minimum tullantı ilə istifadə  perspektivi nəzərdən keçirildi.

     İstehsal prosesi ilə ümumi tanışlıqdan sonra görüş keçirildi. Baş direktor Wang Zhiyi dedi ki, sənaye parkının 20 hektardan çox ərazisində Çinin qabaqcıl texnologiyalarının tətbiqi ilə yüksək keyfiyyətli, müxtəlif ölçülərdə keramik plitələrin istehsalı həyata keçirilir. Müəssisənin məhsulları daxili bazarda satılmaqla yanaşı, region və MDB ölkələrinə ixrac olunur.

     Görüş zamanı dağ-mədən sənayesi üzrə milli iqtisadiyyatımızın şaxəli inkişafı, onun qlobal iqtisadiyyata inteqrasiyası, habelə müəssisənin mineral xammal bazasının dayanıqlığının təmin olunması istiqamətində əlaqələrin genişləndirilməsinə dair fikir mübadiləsi aparıldı.