İqtisadi İslahatların Təhlili və Kommunikasiya Mərkəzində “Yerin təkinin geoloji öyrənilməsinə və mineral xammal bazasından səmərəli istifadəyə dair 2020-2024-cü illər üçün Dövlət Proqramı”nın 2024-cü il üzrə ilkin monitorinq hesabatı müzakirə olundu. Mərkəzin icraçı direktoru Vüsal Qasımlı Dövlət Proqramının uğurla icra olunduğunu vurğuladı, 2024-cü il üzrə icrası hədəflənən işlərə dair monitorinq nəticələri barədə məlumat verdi.

Ekologiya və Təbii Sərvətlər nazirinin müavini Vüqar Kərimov Dövlət Proqramının effektiv icrası ilə bağlı mümkün addımların atıldığını, işin təşkilinin koordinasiyalı şəkildə həyata keçirildiyini vurğuladı. Nazir müavini dedi ki, proqramın uğurlu icrası təkcə resursların optimal idarə olunması üçün yox, ekoloji və iqtisadi davamlılığın təminatı üçün də vacibdir.

         Dövlət Mineral Xammal Ehtiyatlarından İstifadə Agentliyi, Geoloji Kəşfiyyat Agentliyi və “AzerGold” QSC-nin nümayəndələri isə çıxışlarında 2024-cü il üzrə ilkin monitorinq hesabatı barədə rəy və təkliflərini diqqətə çatdırdılar. Yerin təkinin geoloji tədqiqi və mineral xammal bazasından səmərəli istifadənin təmin olunmasına dair növbəti Dövlət Proqramının uğurla hazırlanması məqsədilə potensial əməkdaşlıq imkanları müzakirə edildi.