Beynəlxalq forumda Dövlət Mineral Xammal Ehtiyatlarından İstifadə Agentliyinin rəsmiləri də iştirak etdilər.

Tədbirdən əvvəl Ümummilli Lider Heydər Əliyevin Naxçıvan şəhərindəki abidəsi ziyarət olundu. Açılışda Prezidentin Naxçıvan MR-da səlahiyyətli nümayəndəsi Fuad Nəcəfli çıxış etdi. O, Muxtar Respublikanın iqtisadi və ekoloji tarazlığının təmin edilməsi işində atılan addımlardan, bu istiqamətdə mövcud dövlət proqramının icrasından danışdı. Ətraf mühitin mühafizəsinin, təbii resurslardan səmərəli istifadənin və geoloji tədqiqatların müasir texnologiyalar əsasında aparılmasının başlıca prioritetlər olduğu vurğulandı. Foruma beynəlxalq qiymətləndiricilərin dəvət olunmasında isə əsas məqsəd filiz yataqlarının geoloji potensialının obyektiv və müasir metodologiyalar əsasında qiymətləndirilməsi, yüksək dəqiqlikli geoloji məlumat bazasının formalaşdırılması və investisiya imkanlarının açılmasıdır.

Panel müzakirələrdə Dövlət Mineral Xammal Ehtiyatlarından İstifadə Agentliyinin sədr müavini Elçin Məcidov “Azərbaycanın dağ-mədən sənayesində mövcud vəziyyət və strateji hədəflər” mövzusunda, Maliyyə və təsərrüfat şöbəsinin müdiri Elnur Həsənli isə “Yaşıl mədənçiliyin tətbiqi, müasir çağırışlar və həllər” mövzusunda çıxış etdi. Azərbaycan, Türkiyə və Özbəkistan təmsilçiləri geoloji axtarış və mədənçilik sahəsində innovativ metodlar, əldə olunan nəticələr, eləcə də əməkdaşlığa dair imkanlar müzakirəyə çıxarıldı, forum iştitkçılarının sualları cavablandırıldı.  

     Naxçıvan MR-da mövcud filiz və qeyri-filiz faydalı qazıntı yataqlarından götürülmüş süxur, mineral resurslar və tikinti materialları nümunələrini özündə əks etdirən rəsm əsərlərindən ibarət sərgiyə baxıldı.