Dövlət Mineral Xammal Ehtiyatlarından İstifadə Agentliyinin sədri Samir İdayətov Milli Məclisin Təbii ehtiyatlar, energetika və ekologiya komitəsinin iclasında çıxış etdi. Agentliyin sədri bildirdi ki, Prezident İlham Əliyevin qeyri-filiz faydalı qazıntı yataqlarından istifadə sahəsində idarəetmənin təkmilləşdirilməsi ilə bağlı müvafiq Sərəncamına əsasən “Yerin təki haqqında” Qanunda dəyişiklik edilməsi barədə qanun layihəsi hazırlanıb. Aparılmış təhlillər, mövcud problemlər və çatışmazlıqlar nəzərə alınmaqla təbii resurslardan səmərəli istifadə, mineral xammal bazasının genişləndirilməsi, geoloji öyrənilmə, monitorinq və nəzarət mexanizminin təkmilləşdirilməsi, istismardan sonrakı mərhələdə rekultivasiya işlərinin aparılması, habelə, dağ-mədən işlərində tikinti, texniki təhlükəsizlik məsələləri, tədqiqat və sınaqların aparılması, dövlət standartlarının hazırlanması və beynəlxalq təcrübəyə inteqrasiya istiqamətində təkliflər verilib.

Təklif edilən dəyişiklik təbii ehtiyatlardan kompleks istifadə olunması, hüquqi mexanizmlərin tənzimlənməsi, ekoloji təhlükəsizliyin gücləndirilməsi və dağ-mədən fəaliyyəti nəticəsində yaranan tullantıların dövriyyəyə cəlbi, onun hüquqi əsaslarının dəqiqləşdirilməsi məqsədini daşıyır.