Kiçik və Orta Biznesin İnkişafı Agentliyinin (KOBİA) təşkilatçılığı ilə Dövlət Mineral Xammal Ehtiyatlarından İstifadə Agentliyinin əməkdaşları Bakıda karxana fəaliyyəti ilə məşğul olan sahibkarlarla görüş keçirdi. Ekologiya və Təbii Sərvətlər Nazirliyində keçirilən görüşdə  istismarçıların karxana fəaliyyətinin hüquqi əsaslarına dair sualları cavablandırıldı. Təşkil olunan tədbirdə 20 sahibkar, Əmlak Məsələləri Dövlət Xidmətinin və Abşeron Rayon İcra Hakimiyyətinin əməkdaşları da iştirak etmişlər.

Bu kimi görüşlərin təşkil olunmasında əsas məqsəd karxana fəaliyyəti ilə məşğul olan sahibkarları bu sahənin hüquqi normaları haqqında maarifləndirmək, onların qarşılaşdıqları problemlər ilə tanış olmaq və hər birini dinləməkdir.  Belə ki, təşkil olunan görüşdə faydalı qazıntı yataqlarının istismar qaydaları, hüquqi tənzimlənməsi sual-cavab formatında agentliyin mütəxəssisləri tərəfindən istismarçıların diqqətinə çatdırıldı. Qeyd edək ki, bu kimi görüşlərdə hər bir sahibkar iştirak edə bilər.