Yanvarın 29-da yer təkindən istifadə üzrə 2026-cı ilin ilk hərracı keçirildi.

Dövlət Mineral Xammal Ehtiyatlarından İstifadə Agentliyinin təşkilatçılığı ilə keçirilən hərracda Sumqayıt şəhərində yerləşən “Sumqayıt” gil yatağı, Göyçay, Ağsu və İmişli rayonlarında yerləşən “Göyçay”, “Ağsuçay” və “Bəhrəmtəpə II” qum-çınqıl yataqları, həmçinin Ağdam rayonunda yerləşən “Şelli” və “Burundağ” üzlük daşı yataqları auksiona çıxarıldı. Ümumilikdə dağ-mədən fəaliyyətilə məşğul olan 11 şirkətin təmsilçisi auksionda iştirak etdi. Hərrac rəqabətli keçdi. Yekun təkliflər start qiymətlərindən dəfələrlə çox oldu. Hərrac başa çatdıqdan sonra komissiya üzvləri və qaliblər yekun protokolu imzaladılar. Belə ki, sözügedən faydalı qazıntı yataqlarının hər birinin 1 lot üzrə sahəsində istismara icazə verildi.

      Budəfəki auksionda əsas məqsəd regionlarda yer təkindən qanunauyğun istifadənin təşviqinə, tikinti və yenidənqurma layihələrinin uğurlu icrasına, habelə dağ-mədən işlərinə xarici investisiyanın cəlb edilməsinə dəstək olmaqdır.