Dövlət Mineral Xammal Ehtiyatlarından İstifadə Agentliyinin təşkilatçılığı ilə yer təkindən istifadə üzrə növbəti hərrac keçirildi. Bakı şəhəri Əmlak Xidmətləri Məkanında Balakən rayonu inzibati ərazisində yerləşən “Katexçay”, Oğuz rayonundakı “Daşağılçay” qum-çınqıl yataqları və “Nic” gil yatağı auksion yolu ilə hərraca çıxarıldı. Beləcə, 3 faydalı qazıntı yatağının ümumilikdə 6 LOT üzrə sahələrində istismara icazə verildi. Hərrac komissiyasının sədri Elçin Məcidov dedi ki, bu auksion Şimal-Qərb regionunda yer təkindən qanunauyğun istifadənin təşviqilə yanaşı tikinti və yenidənqurma layihələrinin uğurlu icrasına da təkan olacaq.

Dövlət başçısının müvafiq sərəncamına əsasən, hazırda Oğuz-Şəki rayonları ərazisində “Əlicançay” su anbarının tikintisi davam edir. Bölgədəki gil və qum-çınqıl yataqlarından əldə olunacaq hasilat bu strateji layihəni zəruri xammalla təmin edəcək.

         Hərrac başa çatdıqdan sonra komissiya üzvləri yekun protokolu imzaladılar.